Cuatro años tardó en llevar a cabu el proyectu pero Carrera nunca nun olvidó esi momentu. «La frase quedóme grabada, y namás vi la ocasión aproveché pa organizar la banda». La oportunidá llegó na Cabalgata Reis de 2016, en Llaviana, cuando-y propunxeron desfilar colos alumnos y alumnes de la Escuela de Música A Mansalva, de la que ye director. «Nos suxirieron desfilar vestíos con traxe de mineru, con cascos y demás, como manera de reivindicar les cuenques».

Y ehí encaxaron les pieces: nacieron los Gaiteros del Carbón.

Anque munchos de los sos componentes taben comprometíos con otros proyectos, la ilusión foi contaxosa y sacóse tiempu d’onde nun había pa poder ensayar. «Tenemos un compromisu pa cola música asturiana de raíz y, dende llueu, pa cola cultura asturiana, qu’inclúi a la minería», esplica Carrera. Dempués d’unos meses d’ensayos, con una indumentaria y repertoriu mínimu pero trabayaú debuten n’ochobre de 2016 nel Festival El Xarandal en La Felguera. Y fáenlo a lo grande, acompañando a Celtas Cortos.

«Ye una banda mítica, que lleva más de venti años na escena nacional y siempre se caracterizó por ser mui reivindicativa. Nos dieron la oportunidá d’actuar con ellos y se creó una mui buena complicidá ente dambes dos partes».

L’estrenu foi un éxitu y dende entós trabayen pa consolidar una propuesta que pide «non solo que cada miembru sepa tocar bien el so instrumentu, sinón que tenga un nivel de compromisu y esixencia». Ye lo que caracteriza a los ventiséis componentes.

«Al traviés de la Escuela de Música creóse una auténtica familia, son alumnos y alumnes que crecen xuntos y que van acoyendo a los nuevos». Por eso, esplica Carrera, lo importante agora ye consolidar el grupu, aumentando’l repertoriu y ameyorando a nivel personal. «Y, anque nun ye un oxetivu inmediatu, tamién tamos plantegándonos nuevos proyeutos».
Dende’l so nacimientu, “Gaiteros del Carbón” fizo multitú d’actuaciones en desfiles, entregues de premios, feries, ceremonies… Tamién participaron n’espectáculos con artistes como Celtas Cortos, Marisa Valle Roso, Los Berrones, Ilustres Patilludos o Dixebra, ente otros.

Actualmente tan dirixíos por Pablo Carrera y Arsenio Ruíz.